تجربتي الناجحة لوصفة أعادت لي شعري بعد أن كنت صلعاء

أنا جربت الوصفة ديال الأخت أم حفصة
ورجعت نقول ليكم النتيجة ديالها
اللي مازال مادارتها تنوض دابا تجيب التومة والحلبة وتديرها
الله يجازيك بكل خير أختي أم حفصة على هاد الوصفة الخطييرة
أنا درتها و صبرت لريحة والحمد لله خلف لي شعري ورجع أحسن من الأول
والله شاهد علي
درتها تقريباً شي 3 أشهر
درت الحلبة ترقد ليلة الغد زدت التومة وطيبتهم مزيان
خليتهم يبردو وبديت كانطحن مع زيت العود
الدار ريحتها ولات غي تومة وحلبة
بابا قال ليواش شي حسوة جديدة هادي ههههه
درتها في ميكات صغار او دخلتهم الفريغو وليت نهار السبت كنعيط لماما من الخدمة نقول لها خرجي لي ميكا
كنجي مع 12 نتوضى ونطلي ندير ميكا او زيف او نضربها بنعسة هديك العشية (مابقى لا دوران لا والو شعري هو الأول  )
ملي نفيق نصلي العصر نوجد الحنة مع القطران حتى الليل او كنمشط شعري او نطلي الحنة او نرجع الميكة
نهار الأحد كنمشي الحمام
وشريت واحد الشمبوان من زين الأتات ديال القطران كيدير 380 درهم
ملي كنجي للدار كندهنو بزيت الحية خدتو من درب السلطان ب 190 درهم
إو هاد الشي بقيت متبعاه شي 3 أشهر
منعودش ليكم كيف ولات ريحتي وريحة فولاراتي أخوتاتي مابقاوش كيقربو ليهم ههههههه
ولكن الحمد والشكر لله والله تم والله إلى خلف لي شعري وكلشي كيسولني اشنو درت
وهاد الوصفة كتوالم حتى الشعر الناشف حيت ختي حتى هاي دارتها هي شعرها ناشف او أنا عادي
او دبا مابقيت كندير ليه والو
يالله قلت نعاود ندير ليه سكنجبير طري مرة مرة إنشاء الله
ايوا هاد الشي اللي كين قلت ندخل نقول ليكم تجربتي على الله تزعمو تستفدو منها
وناخد معاكم شوية الأجر في هاد العواشر ههههه
المصدر
أناقة مغربية

قد يعجبك ايضا
عرض التعليقات (1)