الوصفة لي سمعتها فالراديو والوحيدة لي حبسات ليا تساقط الشعر وقواتو ورطباتو ليا
السلام عليكم،ليوم جبت لكم واحد الوصفة كنستعملها سمعتها فالراديو و كنصح بها كاع صحباتي لي عندهم نفس المشكل و الحمد لله من أول تجربة كتبان النتيجة لا من نحيت تساقط الشعر و لا من ناحيت رطوبية.
ندوزو المقادير:
100غ قرنفل مطحون
50غ ثوم مطحون
زيت الخرواع + زيت الذرة (ديال الطياب)
شوية من زعفران شعرة
نخلط هاد المقادير مزيآن ونخلهم يرتاحو 30 دقيقة غدين تلقاوهم نشفو زيدو من زيت الذرة حتى يولي الخليط قابل للدهن و من بعد ديروه فالفروة ديال الشعر و حكوه مزيان و ديرو على الشعر الميكة ديال الأكل (بالفرنسية Papier Cellophane) و ديرو فوقها زيف و خليوه ساعة (ولا بغيتوا نتيجة أحسن خودو فوطة كبوا عيلها الماء سخون عصروها وديروها تحت الزيف)، و من بعد غسلو الشعر عادي،ملاحظة الريحة ديال القرنفل كتكون قوية وكتبقا في الشعر ولكن راها زوينة ولي مبغاتهاش تبقى تخد شوية ديال خل التفاح مع الماء الساخن وتخشو على شعرها وتغسل بالماء ودهنو شعركم بالزيت لي مولفين كتستعملو
أنا هاد الوصفة كنديرها ديما و خصوصا فاش كتجي بعض الفترات شعري تيطيح فيها بزاف كنتبعها شهر واحد من بعد صافي مكنبقاش نديرها،و صراحة نصحت بيها بنات و دراري وكاع عجباتهم و Gلت نكتبها هنا باش كلشي يستافد