الماسك لي هناني من شعر الوجه والنقط السوداء…نتيجة راااعة

انا بصراحة ملي كنت فالدار قبل زواج كنت كنديرو وبقيت كنديرو حيت رائع وساهل والنتيجة كتشوفيها بعينيك من اول استعمال
كينقي الرجه كيولي صافي وملس ومعا المداومة الشعر غدي يختافي تماما

تبعو معايا الوصفة ونتمني تجربوها

غنحتاجو :

فول بكمية قليلة متلا معلق
)الفول كيبيض البشرة وللكن كينشفها بزاااااف متكتروش منو )
حمص بكمية مهمة كيف مكتلاحضو فالصوزة انا عيني ميزاني مكنعبرش
والدرة بكمية لمهم عينكم ميزانكم ههه كونو سخيات مع وجهكم ههههه
وغنحتاجو بياض بيض مشي الصفار غير البياض انا هد الكمية اللي عندي تاع تلاتة البيضات

غدي نشدو الحبوب اللي عندنا كل من الفول الحمص الدرة ونطحنوهم شوفو غير فرشوهم بلا متصدعو راسكم معاهم اوكي حيت باقي تابعكم طحيت وتغربيل هههه

من بعد غدا نضيف عليهم بياض البيض اللي عندي الي حتاجيتو لشي بيضة زيدوها كاملا اه غير خاص الخليط يجي مبسبس فهمتوني مشي جاري اوكي

كنفرش الخليط فوق منديل نقي وحاطاه فوق لاطة باش يسهال النقل ديالو نحطو فشي بلاصة مهويا وبعيدا علي الشمس خاصو ينشف الظل مفهوم

انا خاد ليا خمس ايام ومرا مرا كندوز نفتت هدوك القطع الكبار هكا بصباعي باش ينشفو بسرعة

حتا ولا يابس تماما بحال هكا

من بعد كنطحنوه عادي بالطحانة مزيان وكنجيبو شي زيف ضيق بزاااف ونطحن ونغربل فالزيف خاص نحصل علي دقيق من بحال النشا هكاك رقيق بزاااف ومغربل مزيان باش تنجح ليا الوصفة

هدي الصورة من بعد ماطحنتو وغربلتو هكا حصلت علي الدقيق

من بعد كنحتافض بيه فعلبة تكون عندها الغطا ونحتافضو بيه فمكان جاف مفيهش الرطوبة ومتخافوش راه كيبقا اطول مدة ممكنة انا فالصيف كنوجد منو كمية حيت فالبرد صعيب هنا فالغربة تيبسي الحاجة خاصك ليها شهر هههه

بالنسبة لطريقة الاستعمال انا كنخلطو بماء البابونج كيف ميمكن ليكم تخلطوه باي سائل عندكم

وخاصكم تحصلو علي خليط الكتافة ديالو تقيلا شوي باش مياخدش وقت اوكي يكون تقيل شوي

وكنغسلو وجهنا بالصابون طبيعي مزيااااااان حتا متبقا فيه حس من الدهون اللي كتفرز البشرة باش يشد الخليط وكنشفو نخليه شوي ينشف ونطلق الماسك فوق وجهي انا كنطلقو شوي غليض باش يشد الزغب رقيق والخليض
وكنخليه ساع ونصف وكنتكا حتا ينشف علي خاطرو متهدرو متحركو وجهك كيولي بحلا مكبس هههههههه
وبداي ملي ينشف تقشري فيه بضفارك جري الماسك شوي بشوي بالاتجاه المعاكس للشعر ولاحضي القطع اللي حيدتي كاوديها معا الضوء وشوفي الزغب هكاك محيز وحتا النقط السوداء كتشوفي القلب ديالها فالماسك

بصراحة كنتمني تجربوه حيت ممتاز وكيستاحق التجربة

تحياتي