الخلطة لي دارت ضجة بين البنات جربتها فشعري وشعر بنتي مصدقتش فعلا أقوى كيراتين طبيعي

السلام عليكم البنات و الله حتى هادي احسن وصفة جربت فحياتي ديال الشعر كتعطي نتيجة من المرة الاولة نعومة و لمعان و التساقط تيقل بنسبة 80 % و كتخلي ريحة كتحمق فالشعر و مع المداومة كتنبت الشعر و طولو بإختصار حل لجميع مشاكل الشعر و هي كدار مرة فالاسبوع نخليكم مع المكونات.

المكونات:

6 معالق ديال حنا (ماشي ديال البكية قولي للعطار الحنة ديال الشعر)
4 معالق السانوج مطحون و مغربل رقيق
معلقة كبيرة قرنفل مطحون و مغربل رقيق
معلقة كبيرة قرفة مطحونة و مغربلة رقيق
معلقة كبيرة الزرودة مطحونة و مغربلة رقيق
4 معالق كبار عسل (خودو واحد العسل زوين فمرجان سميتو عسل كل الازهار ثمنو مناسب )

3 معالق كبار زيت الزنجلان او زيت الكوك او زيت عافية
صفار بيضة للشعر الجاف او البياض للشعر الذهني
نص علبة دانون مسوس
معلقة كبيرة خل التفاح او خل ابيض

ملاحظة :

خاص طحنو الاعشاب و تغربلوهم رقيق عاد تاخدو منهم المقادبر لي كتبت ليكم

الطريقة:

غادي تزيدي الاعشاب مع الحنا و تخلطيهم بما طايبة فيه البصلة ماتكتريش الما غير القدر لي تجمع بيه شوية الحنا عاد تزيدي باقي المكونات و تخليها تخمر ساعة و من بعد دريها لشعرك خصلة خصلة و ديري ليه بوني او ميكة متقوبة باش يتنفس راسك و لبسي فولار غليض و خليها على الاقل اربع ساعات
قبل ما تغسليها و جدي شامبو طبيعي باش تغسلي راسك غدي ديري جوج كيسان عنبة ديال الما فكسرونة حتا يطيب الما و طفي عليه و زيدي ليه شوية ازير و شوية الريحان و شوية السدر و غطي الكسرونة و خليه حتا يبرد و صفيه و ديريه فقرعة الزاج و زيدي ليه ثلاثة ديال المعالق ديال شامبو جونسون و سدي القرعة و مخضيها مزيان و هادا هو السر باش الشمبو يرغوي ليك مزيان فشعرك خاصك تمخضيه مزيان ، ملي دخلي للدوش غسلي شعرك مزيان بالما دافي باش مايلصقش ليك البيض فشعرك بلا ماتستعملي المشطة نهائيا غير بيدك حتا يصفا شعرك من الحنا و ديري الشامبو الطبيعي جوج مرات عادي و شلي شعرك مزيان و نشفيه و دهني الاطراف بزيت الزنجلان او زيت الكوك و ديري باتشا ملي نشف شعرك غادي تنباهري بالنتيجة واحد النعومة بحال الحرير و الشعر تيلمع و الريحة رائعة.

قد يعجبك ايضا
اترك تعليقا