لالة … هاذي أول عراضة ليك !!؟؟ آجي نتعاونو عليها “نصائح قيمة “

عروسة جديدة ألف مبروك وربي يثبت الغرس، الناس جايين يباركوا لكم انت و راجلك، و قررتوا أو غالبا راجلك هو اللي قرر يدير لهم ضيافة، خايفة، تالفة، مضطربة، و لكن باغية تبيني حنة يديك و تحمري لراجلك وجهو و ترضي ضيوفك؟ توكلي على الله، وآجي نعطيك بعض الأفكارو الإقتراحات، و انتي قرري من بعد:

1. نظفي دارك و شمسيها و هويها

 

وجدي الفوطات،لي ناب والمنادل صبنيهم و حدديهم + لي ناب ديال البلاستيك عادة تيتحتاجو بحساب ثلاثة فالطابلة أو أكثر على حسب شحال من نوع ديال الأكل.


و لكن اقتراحي هو حسب أنواع الأكل اللي غادية تقدم و طريقة تناولها، بمعنى إلا كنت غادية تصبي لضيافك الأكل ديالهم كل واحد فالطبق الخاص به، و حطيتي من الأول قدام كل واحد عدد الأطباق المناسب لأنواع الطعام، بلاش منهم غير واحد يكفي: قدمي الأكل فوق الناب ديال الثوب و المنادل ديالو مباشرة حتى يكملو و فوقت تقديم القهوة و الشاي، من الأول اختاري زوج ديال لي ناب ديال الثوب زوينين، فرشي الأول بلا منادل، وفوقو واحد ديال البلاستيك ، عاد الآخر ديال الثوب و المنادل ديالو، و حطي الأطباق و الكيسان و الملاعق و الشوك و السكاكين،( الناب ديال البلاستيك غادي يمنع تسرب أي سائل وقع بالغلط أثناء الأكل).و لما يكملو تناول الديسير هزي الناب الفوقاني و ديال البلاستيك لي تحتو و وزعي المنادل ديال الناب الأول, تنظن هذا أريح لك حيت كلما غيرتي ناب بلاستيك غادية تكوني مضطرة لتغييرالأطباق..إلخ

فويطات صغار بعدد المدعوين+ 6 احتياط باش تبلليهم بماء زهر أو ماء و كولونيا و تحطيهم وراء الماكلة للضياف باش يمسحوا يديهم باش تنقصي عليك روينة غسيل اليدين: إلا الحال بارد خاصهم يتقدمو سخان: حطيهم فطبق زجاج و من الأحسن يكون هو نفسو لي غادية تقدميهم فيه غطيهم بالبلاستيك الغذائي و دخليهم زوج دقائق للمايكرووند، وإيلا الصيف غير باردين.

2. المواعن:

الصواني ديال آتاي, طباسل، كيسان، زلايف، شوك، ملاعق، سكاكن ….إلخ كلشي يتغسل و يتمسح و يتوجد على تيساع .

وجدي أيضا بلاستيك غذائي/علب بلاستيك بالأغطية ديالها / 4 أحواض= بانيوات بلاستيك كبيرة/1 بانيو بلاستيك كبير:

-البلاستيك الغذائي: أول ما ترجعي طبق أكل رئيسي انتهاوا منو الناس، غطيه مزياان بالبلاستيك الغذائي حتى يمشيو الناس و نشوفو آشنو غاديين نديرو به.
-علب البلاستيك: غادين نحتاجوها فالأخير، من بعد و نقول لك.
-4 أحواض= بانيوات بلاستيك كبيرة: حطيهم بجانب بعض فالمطبخ، أول ما تهزي الطباق و الكيسان ..إلخ من فوق الطبلة، حطي الأطباق فبانيو، الكيسان فبانيو…إلخ باش يسهال عيك الغسيل ديالهم
-بانيو بلاستيك كبير: حطي فيه أطباق التقديم الكبيرة

3.ديري كريم لرجيلاتك, ماسك لشعرك و لوجهك, حيت الناس جايين يتضايفو و يشوفوك خاصك تكوني مشرقة، ووجدي آشنو غادية تلبسي على تيساع… تيبقى القفطان البلدي المغربي فرأي أحسن اختيار، مستور، شكل جميل، مع شي تخميلة وتزارة مريح للشغل.

اقتراحات حسب الميزانية:

ميزانية بسيطة:

جرت العادة المغربية أننا تنستقبلو الضياف بأتاي و الحلوة أول ما تيسخنو بلاصتهم، آتاي ما فيه مشكل، الحلوة تيخصنا نوجدوها على الأقل بثلاث أيام و نرتبوها فالبلاطويات باش تبقى محافظة على الطعم و الشكل ديالها، اقتراحي هو عجين صابلي واحد خرجي منو شكيلات حسب ذوقك و إمكانياتك، عجين صابلي اقتصادي و تيخرج كمية كبيرة بزاااااف …

و حتى إلى بقات عندك العجينة سدي عليها فأكياس بلاستيك و ديريها فالثلاجة راها تتصبر حتى ل 15 يوم.
و يكون أحسن إيلا كنت عروسة جديدة تسبقي شوية التمر و الحليب+ ماء زهر

 

و نوجدو أيضا كيكة و نزوقوها بالشكلاط و الكوك …باش نقدموها فالأخير مع القهوة كحلة، و صينية أخرى ديال أتاي و الحليوات اللي وجدنا.

2.السلطة :

 

 

 

الروزمصلوق+ الطون +خيزو محكوك غليض و معصور+ زيتون أسود مقطع + ذرة + كورنيشون محكوك غليض+ مايونيز+ إبزار+ ملح+زيت زيتون+ شوية عصير الحامض, جمعي العناصر كلها، دهني طبسيل غارق أو سوبيير بالزيت عمريها بالخليط غطيها جيدا بالبلاستيك الغذائي و دخيها للثلاجة تجمع راسها، قلبيها مباشرة فطبق التقديم و زيني غير الجناب بالخس بلا ما تفرشيه حيت غير تذبال و يضيع، و زوقي الجناب بشوية الخضر مسلوقة و الزيتون و البيض مسلوق، و ما تخوي على الخضر مسلوقة الدريسينغ: صلصة الخل و الحامض و زيت الزيتون و الملح و لبزار إلا قبل التقديم مباشرة, و بالنسبة لطريقة التقديم تنصح بمشاهدة رابط

استقبلي ضيوفك بهذه السلطة الراقية على شكل كيكة

سلطة مغربية بتقديم راقي وجميل

3. اقتراحات أطباق اللحم حسب عدد و جنسية الضيوف و الإمكانيات المادية المتاحة:

كسكس اللحم بالخضر و التفاية من الفوق،… يمكن استعمال الكسكس الجاهز و إضافة التفاية عند التقديم
طاجين لحم بالخضر،

سفة الشعرية مدفونة باللحم مبخر

طاجين لحم بالفواكه الجافة و المكسرات

 

طنجية لحم بالحامض مصير

سفة الشعرية مدفونة بالدجاج

رفيسة حلوة بالدجاج

ملاحظة: بالنسبة لاختيار الأطباق الرئيسية، نحاولو نعملوهم بنكهات مختلفة عن بعض مراعاة للتنويع، مثلا إلا عملنا طبق اللحم حلو نعملو طبق الدجاج حامض و مالح و العكس صحيح

إقرأ أيضا
حصرياً ... صور الليلة من زفاف أخ الفنانة أسماء لمنور ياسين

و مع الأكل اللي غادي يتكال بالخبز، قدمي شوية سلطات مطبوخة :زعلوك دنجال/زعلوك كرعة / فول مشرمل ..إلخ + زيتون

فرقيهيم على الطابلة فطبيسلات صغارأو طويجنات فحال هادو.

و ماننساوش طبعا،الماء/ الخبز/ المونادة.

6.آتاي+قهوة بلا حليب مع الحلوة + الكيكة.

 

وإلا كان غداء والناس غادين يبقاو حتى للعشية, خلي الكيكة حتى تحطيها مع بغرير

 

حرشة
قريشلات

مع القهوة بالحليب و آتاي.

كلمات الترحيب و الحفاوة, و الإبتسامة على الوجه, عراضة اقتصادية و تتحمر لوجه، خصوصا إذا كنت على وضوء وسميتي الله قبل ما تبداي التحضيرات، و ذكرتيه كثيرا وانت تتحضري تيجي بالتجريب الأكل بنين و فيه البركة بإذن الله

ميزانية متوسطة:

زيادة على الإقتراحات السابقة غادية نضيف البعض:

1. تمر معمر و حليب بماء زهر.

2.آتاي+ حلوة صابلي و حلقي عليها بالكوك و كاوكاو و الشكلاط + حلوة اللوز.

 

 

3. .سلطة جاردينيير متنوعة، أو فحال السابقة، و زوقيها بشوية الكروفيت مسلوق أو شاركيتريcharcuterie

 

4. اقتراحات أطباق الدجاج حسب عدد و جنسية الضيوف و الإمكانيات المادية المتاحة:
زيادة على الإقتراحات السابقة غادية نضيف البعض
دجاج معمر بالفيرميسيل و القشيوشات و محمر

بسطيلة الدجاج و اللوز,

بسطيلة الدجاج بطريقة الحوت تقدري تقدميها فهاد الشكل:

طاجين دجاج بالشومبينيون و لكريم فريش

publicité

دجاج معمر بسفة الكسكس و اللوز و الكركاع و الزبيب, معسل و مخضر بالفواكه الجافة.

5.اقتراحات أطباق اللحم حسب عدد و جنسية الضيوف و الإمكانيات المادية المتاحة:

 

زيادة على الإقتراحات السابقة غادية نضيف

طاجين اللحم بالشومبينيون و لكريم فريش

6. فواكه الموسم و زيدي عليها رشيشة ديال الفواكه الجافة و المكسرات، أو سلطة فواكه فحال السابقة +قطع أناناس+ زبيب مغسول و مرطب فالماء من قبل و مسقطر + كريم فريش+ مكسرات+شكلاطة للتزيين, أو طارط فواكه متنوعة.

7.آتاي + قهوة + الحلويات السابقة + كيكة أو طارط مكسرات.

 

وإلا كان غداء والناس غادين يبقاو حتى للعشية, خلي الكيكة أو طارط المكسرات حتى تحطيها مع بغرير، مسمن، حرشة، بريوش, قريشلات مالحين, مع القهوة بالحليب و آتاي.

ميزانية مريحة:

2.كاطو سواري + عصائر.

3.آتاي مع حلويات لوز+ شكلاطة

 

4.سلطة بالخضر و الشاركيتري charcuterie و الفروماج

أو بالخضر+ كافيار,سومون فيمي، سوريمي, فواكه البحر

5.إلا كان عشاء أحد الإقتراحين السابقين أو شوربة سمك

قدميهم مع قطبان بيبي أو لحم أو دجاج أو كفتة أو بريوات مالحين أو مملحات متنوعة أو تشكيلة متنوعة مما ذكر
6. اقتراحات أطباق اللحم:
زيادة على اقتراحات اللحم السابقة، تيبقى الشوى هو سيد أطباق اللحم فالمناسبات

المشوي

تيترافق طبعا بآتاي زيادة على الماء و المونادة و مانساوش الملح و الكمون و بعض السلطات المطبوخة و الخبز أكيد

أو الضلعة معمرة و محمرة

وطبعا إلا غيرنا شوية فالطياب و طريقة التقديم، النتيجة غادية تكون متميزة و جديدة

7.اقتراحات أطباق الدجاج

زيادة على ما سبق ممكن إضافة اقتراح بيبي معمربسفة الكسكس و اللوز و الكركاع و الزبيب و محمر فالفران

أو بسطيلة بالحمام

 

أو كوكليات معمرين

8. اقتراحات أطباق السمك
بسطيلة السمك و فواكه البحر

9. بالنسبة لاقتراح الديسير

فواكه الموسم و/ أو كاطو كلاصي فالصيف أو سلطة فواكه جمعي فيها من كل فن طرف

قطيفة مغربية بالكريمة و الفواكه أوبالكريمة و المكسرات

البسطيلة بالحليب المسماة قطيفة

 

10.آتاي + قهوة + الحلويات السابقة + طارطات .

وإلا كان غداء والناس غادين يبقاو حتى للعشية, بغرير، مسمن، حرشة، بريوش,فيينوازري, قريشلات مالحين, مع القهوة بالحليب و آتاي.

طلعي تاني للفوق و شوفي مزياااان و فكري، و تشاوري.

صافي بدات تتضح عندك الصورة؟

إيوا دابة قولي باسم الله و على الله توكلت وخودي ورقة و قلم و كتبي آشنو قررتي تصاوبي،وآشنو بغيتي تديري فالأكل و الحلوة و المشروبات و الديسير، حسب ميزانيتك، و عدد ضيوفك، و الأكل اللي عارفة راسك غادية تقنيه. و المواد و المقادير اللي خاصك تقدايها، ثلاث أيام قبل العراضة خاصك تبداي فالتوجاد ديال الحلوى، الأكل اللي غادي يدخل للفران طيبيه و ديريه فالمجمد حتى لليلة ديال العراضة و خرجيه من المجمد باش يتطلق و قبل التقديم دخليه للفرن يتحمر باش تقدميه مباشرة ما حدو ساخن، الشوربات أيضا ممكن توجديهم من قبل و تخليهم فالثلاجة حتى يسخنو فوقتهم,تصلقي الخضر ديال السلطة، تصاوبي السلطات المطبوخة، ممكن تطيبي كلشي على تيساع و تحطي فالمجمد أو الثلاجة، يبقى نهار العراضة غير التسخان بالنسبة للماكلة و الخبز و المونطاج بالنسبة للسلطات، و التقديم طبعا.

و قبل ما يدخلو الضياف بساعة جيبي طورشون بلليه بالماء عصريه مزيييييان و ضيفي عليه شي معطر مركز ديال الشموع المعطرة و مسحي به الخشب ديال الصالون فين غادين يكلسو الناس، و النوافذ و البيبان، باش تبقى الريحة زوينة، و دوزي به تجفيفة على الدار.
و سيري قادي لاميزونمبلاس ديال الطوابل الناب السرابت لي كوفير كل حاجة تشد بلاصتها

و دابا سيري تلبسي و ديري الماء يطيب لآتاي هاهوما الضياف علاين يدخلو….

خذي نفس عميييق و فتحي الباب و استقبلي ضيوفك و انت مبتسمة بكل ثقة و هدوء و بلا انفعال و بالحفاوة المغربية المعهودة و عبارات الترحاب النابعة من القلب أهلاااا أهلا مرحبا نهار كبيير هذا تفضلوا … دخليهم و جلسيهم، و أعطيهم خمس أو عشر دقائق ديال الصواب، و استسمحيهم باش تمشي توجدي آتاي، طبعا إلا تعمر قدامهم دائما وفق عادة الضيافة المغربية يكون أحسن, عاود اعطيهم الصواب و لما يبقى لموعد تقديم الأكل ساعة لأن المفروض أنك حضرت كلشي من قبل كيفما اتفقنا، استأذنيهم سمحوا لي خوذوا راحتكم الدار داركم…إلخ ،و انتي غادية للمطبخ جمعي الصينية و الحليوات حطيهم فعلبة بلاستيكية و سديها و طرفيها، الكيسان فبانيو و البراد فبانيو آخر، و الصينية مسحيها وحطيها فمكانها، باش مايكثرش عليك الشغل و تحافظي على إيقاع النظام اللي وجدتي له من قبل

إقرأ أيضا
لالة حبيبة تتحفنا من جديد بأحدث تقديمات الفاكية و الحلويات

بداي بالأكل لي تيخصو يسخن فالفرن ديريه فالفرن و الإيدام اللي غادي ينزل من الشوى+ الإيدام اللي غادي ينزل من البسطيلة ما ترميهمش, صفيهم كل واحد على حدة، و ديريهم فقريعات زجاجية ينفعوك لاحقا فعمل رغايف الفران مثلا ، و قادي السلطة، الخبز، الماء،المشروبات، السلطات المطبوخة سخنيها و حطيها فالطبيسلات أو الطويجنات، و رجعي جمعي الصينية من قدام الناس إيلا كانوا غاديين ياكلوا فنفس المكان، أما إيلا كنت غادية تقدمي الأكل فصالون آخر أو غرفة أخرى طلبي منهم يتفضلو لها، و طبعا فهاد الحالة راه خاصك تكوني حاطة الطباسل و الكيسان و الملاعق و السكاكن و الشوك و المنادل من قبل، و مني ياخد كل واحد مكانه، بداي تنزلي قدامهم هاداك شي لي قسم الله ، الخبز أولا، الشوكة و الملعقة الكبار ديال التقديم, ثم الماء و المشروبات، ثم السلطة الكبيرة، وطبعا من الأحسن أنك تقدمي الحصص لكل واحد فالطبق ديالوغيييير بالقياس و ردي البال باش لي بان لك خاصو مزال زيده أولا باش تبيني أنك مهتمة بإطعامهم بإيديك و هذا طبعا قمة حسن الضيافة، ثانيا، باش حتى إيلا رجع شي أكل يبقى نظيف ، دائما بكل هدوء و بدون ارتباك ثقة / ابتسامة / ترحاب

من بعد ما تحسي بالناس قربوا يكملوا استأذنيهم باش تنزلي السلطات المطبوخة و الطبق الرئيسي بعدما تهزي بالطبع طبق السلطة و ترجعيه للمطبخ و تغطيه جيدا بالبلاستيك الغذائي لي اتفقنا عليه من قبل, نفس الخطوات بالنسبة للأطباق الأخرى حتى الديسير، كل ما ترجعي طبق للمطبخ، غطيه جيدا بالبلاستيك الغذائي حتى لمن بعد

كملوا ضيوفك من الديسير، قدمي لهم الفويطات اللي سبق و بللتيهم بماء زهر أو الماء مخلط مع ماء كولونيا، و عصرتيهم، دافيين فالحال بارد و إيلا كان الصيف باردين, و جمعي الطباسل و الكيسان…إلخ فبلاطو بالحاجة بالحاجة حطيها فالبانيوات المعلومين لي فالكوزينة، حتى تخوي الطابلة، ضروري ماغادي يكون شي فتات…إلخ جيبي منديل باش تمسحي و شي حاجة فاش تجمعي لفتات، ديهم للكوزينة عاد رجعي جمعي الناب الفوقاني و ديال البلاستيك لي تحتوغير بالتاويل، و فرقي المنيدلات ديال الناب الأول فوق منو.

إيلا بانوا لك المواعن قلال و قادرة تغسليهم فغضون ربع حتى لنصف ساعة مثلا، أو كانوا بعض الضيفات لي تيفهمو فالصواب و ناضوا معاك للكوزينة باش يساعدوك توكلي على الله، و قضي الغرض هو الأول، أما إذا كان العكس،خليهم حتى لمن بعد و وجدي زوج صواني واحدة لآتاي ولآخرة للقهوة بلا حليب، و الحليوات المعلومين و قدميهم للناس، دائما حافظي على نفس الإيقاع ثقة / ابتسامة / ترحاب، حتى يمشيوا الضياف فحالهم راضيين.

كان الوقت متأخر و حسيتي براسك متعبة لا يكلف الله نفسا لا وسعها، جمعي لي خاصو يتجمع فالثلاجة و سيري ترتاحي حتى للغد، كنت قادرة تبيتي دارك و كوزينتك نظيفة توكلي على الله،بدلي حويجاتك و لبسي شي حاجة مريحة و بداي بالمكان اللي كلاوا فيه الضياف، من بعد الكوزينة، من بعد شي تجفيفة مزياااانة للدار، خذي دوش

صاوبي شي طبيسيل / ات من الأكل النظييييييف باش تسيفطيه /هم مع راجلك فسبيل الله للعساس / الكونسيارج …إلخ لأن الأكل كيفما اتفقنا سربيتيه للضياف كل واحد فطبسيله يعني الأكل لي بقى فأطباق التقديم، و لي غطيتيه مني رجعتيه، المفروض أنه بقى نظيف و طبعا ما تنسايش تخلي منو باش للغذاء ديال الغد وإيلا كان كثير ما فيها باس تذوقي منو الجيران، و حتى الأقارب, و إيلا بقاوا شي لحيمات أو دجاج عينك ميزانك، قطعيهم صغار و ديريهم فالمجمد حتى تعمري بهم من بعد رغيفات أو بريوات…إلخ

ملاحظة :هاد الموضوع نزلتو لمساعدة الأخوات لي فحاجة ليه بنية خالصة لوجه الله تعالى، وطبعا منتدانا زاخر ماشاء الله بأشكال و أنواع الوصفات الراقية و الناجحة و اللي تليق و تشرف في المناسبات و الضيافات, بعض الوصفات والصور اللي فالموضوع أخذتها من المنتدى و البعض الآخر من النت لتقريب الصورة، و توضيح الفكرة، و أيضا لاقتراح بعض الطرق الجميلة و المبتكرة في التقديم، أستسمح أصحابها و أقول لهم أنكم مأجورون بإذن الله تعالى، كما أعتذر من أخواتي اللي منزلين وصفات مشابهة ما قدرتش نزلها لضيق المجال وتنتمنى من أي أخت عندها شي إضافة ما تبخلش بها علينا، و شكرا. تحياتي 🙂

منقول للإفادة



3 تعليقات

  1. Khadija sefrioui

    شكرًا على هذه النصائح القيمة اللي قدمتي لعروسات الجداد، لكن كنظن ان أفضل نصيحة يمكن تقدم ليهم هي ما يرهقوش راسهوم حيت لعراضة كتخلي المرأة ترتابك و عِوَض ما تطبخ هي تضيف على ميزانية لعراضة ثمن طباخة اللي تساعدها و تكلف بالكوزينة و هي تبقى كالسة مع ضيافها مرتاحة و ناقصة توتر

  2. تبارك الله على الصائح القيمة للمبتدئات

  3. تبارك الله على النصائح القيمة للمبتدئين

اضف رد

لن يتم نشر البريد الإلكتروني . الحقول المطلوبة مشار لها بـ *

*